Amazing Maze: Алматы қаласында Латынамерикалық Варгас-Суарез Юниверсалдың жеке көрмесі ашылды

EGIN жаңа мәдени орталығында Варгас-Суарез Юниверсалдың Қазақстандағы тұңғыш жеке көрмесі өтуде. Көрерменді суретшінің соңғы суреттері, саунд арт, киіз жұмыстары мен бейне инсталляциясы күтіп тұр. 

Көрменің Amazing Maze атауы латынамерикалық жазушы Хорхе Луис Борхестің «Айырылған жолдар бағы» шығармасымен байланысты. Шығармадағы лабиринт бағы кітап жазу метафорасы болып табылады. Юниверсалдың суреттердегі векторлар осы лабиринтке сілтеме жасай отырып, лабиринтті тілдік, мәндік, өмірлік мәнмәтінде қарастырады. Оның жұмыстарында Наска топологиялық геоглифтерінің ықпалы айқын көрінеді. Олар суретшінің NASA ғарыш орталығы орналасқан Хьюстондағы бала шағымен байланысты болып келеді.

«Латынамерикалық мистицизм, бақсылар, геоглифтер, тастардағы перуандық құстардың суреттері Қазақстандық мәнмәтінінде молайтылады: Қазақстандағы жартастарға салынған суреттер, түрлі құрылыстар, кірестер. Жалпы Жерді ғарыш тұрғысынан көру ол тек Майя мәдениеті, жұлдызды бақылап, бағытын тапқан көшпенділерге ғана тән нәрсе емес, ондай ерекшеліктер дәстүрлі мәдениеттерде жиі кездеседі», — куратор Влад Слудскийдің көрменің Қазақстандағы өзектілігі жайлы ойы.

Куратордың айтуы бойынша, ғарыштағы ең алғаш адамның Қазақстандағы Байқоңыр космодромынан ұшуы да, NASA-лық инженерлердің арасында өскен Юниверсалдың көрмесімен әсерлі байланыс жасайды. Қазіргі кезде суретші Байқоңыр маңындағы ғарыш қоқыстарын жинайтын адамдарды іздеуде.

EGIN — Алматы қаласында жаңа ашылған мәдени орталық. Қазіргі кезде осы кеңістікте Юниверсалдың көрмесінен басқа отаршылдық жайлы семинар мен ашық лекциялар өтуде. Жобаның жоспарында үлкен кітапхана, түрлі шеберханалар ашу.

Варгас-Суарез Юниверсалдың «Amazing Maze» жеке көрмесі сәуірдің 19-на дейін өтеді. 

Мекенжайы: Алматы қ., Нұрмақов көшесі 79 (EGIN кеңістігі).

Сейсенбі – Жұма  12:00-ден 19:00-ге дейін. Сенбі – Жексенбі алдын ала жазылу бойынша.

Кіру тегін.